Waituhi wānanga ki Ritimana Puna Reo
Nā Raukura Turei - Ngahuru 2024
Ko Raukura Turei au, he ringa toi waituhi, he kaihoahoa, he māmā hoki au ki Tāmaki Makaurau nei.
Ko te kaupeka o Hine Raumati te wā ka kaha kohikohi au i ngā tini uri o Hine Ukurangi, Hine Oneone, Hine Tūākirikiri mā mai i ngā tini takutai moana hurinoa o Tāmaki Makaurau mō āku nei mahi toi. Nō te tini o ngā tae i rapu au ki ngā pari o te Tai Hauāuru, i whai whakaaro au ki te kawe i tēnei kaupapa o te whakarite waituhi mai i te whenua, pērā i tō mātau tīpuna mahi, ki te puna reo o taku tamāhine a Hinauri, ki a Ritimana Puna Reo.
I kawea e au tēnei wānanga mā ngā tamariki i runga i te wairua o ngā mahi rangahau a Kauae Raro, ā, i tuku kōrero e pā ana ki ngā atua e hāngai ana ki ngā momo whenua i whakaritea e mātau. I tīmata te wānanga me te karakia, ā ka tuku mihi ki te whāea a Papatūānuku mē ōna whenua whero ki kurawaka, ko te kōkōwai tērā. I kōrero mātau mo Hine Ukurangi me ōna uri, te uku me the kerewhenua karaka, kōwhai hoki nei. I kōrero hoki mo Papakura, te atua o ngā toka puia me ōna uri māwhero nei te hanga. Ka whakatakoria e au ēnei kōhatu kanorau ki runga i ngā tēpu hei tīpakongia e ngā tamariki.
Kātahi ka whakarite ngā tamariki nohinohi i te waituhi. Kei ia tamaiti tō rātou ake oko (mortar and pestle). Ka pehua ai ngā toka iti kia puehu haere, ka hanumia te mīere hei pia, me te wai, ā ka whakaniko i o rātou ake atua mā te waituhi. Hei kīnaki kā ruirui te onepū, te uri o Hine Oneone ki runga hei pīataata mai.
Te pārekareka hoki o ngā mahi a ngā tamariki nei! He tino taonga ngā kāri ‘Kapunga Oneone’ kua whakaritea e Kahu Kutia hei whakatairanga i ngā atua i roto i ēnei mahi. Mauri ora ki a Kauae Raro mō ēnei matauranga, me ngā rauemi taiea hei whakahiki i te kaupapa!
Mauri ora hoki ki ngā kaiako o Ritimana Puna Reo e whakapau kaha ana ia rā mō ngā tamariki me tō mātau reo rangatira te take.
Ngā mihi maioha to Raukura for her kupu and images. We’ve worked with Raukura to develop this free A4 printable Pou Atua for you to use.
